Senatning Budjet va iqtisodiy islohotlar masalalari qo‘mitasining navbatdagi majlisi bo‘lib o‘tdi, unda soliq va budjet qonunchiligi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritishga qaratilgan qonun hamda Buxoro va Qashqadaryo viloyatlari hududlarini ijtimoiy-iqtisodiy rivojlantirish dasturlari ijrosini o‘rganish natijalari ko‘rib chiqildi.

Dastavval, “Soliq va budjet qonunchiligi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi Qonun ko‘rib chiqildi.

Qonun bilan O‘zbekiston Respublikasining Budjet, Soliq kodekslari, shuningdek “O‘zbekiston Respublikasi Oliy Majlisi Qonunchilik palatasining Reglamenti to‘g‘risida”gi, “Qayta tiklanuvchi energiya manbalaridan foydalanish to‘g‘risida”gi hamda “Davlat boji to‘g‘risida”gi qonunlarga o‘zgartirish va qo‘shimchalar kiritilmoqda.

Xususan, Davlat budjeti to‘g‘risidagi qonun loyihasini va budjetnomani Vazirlar Mahkamasi tomonidan parlament palatalariga kiritish muddati aniq belgilanmoqda.

Budjet jarayonining ochiqligini ta’minlash maqsadida tumanlar va shaharlar hokimliklari jamoatchilik fikri asosida shakllantirilgan tadbirlarni moliyalashtirish bo‘yicha ma’lumotlarni o‘z rasmiy veb-saytlari, shuningdek, “Ochiq budjet” axborot portaliga joylashtirib borishi Budjet kodeksida aks ettirilmoqda.

Shuningdek, Qonun bilan O‘zbekiston Respublikasiga beg‘araz yordam doirasida kelgan tibbiy asbob-uskunalardan pullik xizmatlar ko‘rsatish uchun foydalanish imkoni yaratilmoqda.

Bundan tashqari, budjet tashkilotlariga ijaraga berilgan yer uchastkalaridan soliq undirish va to‘lash tartibini, foydalanilmayotgan binolar, ishlab chiqarish maydonlari va yer uchastkalariga nisbatan tegishli soliqlarning oshirilgan stavkalarini qo‘llash tartibi bekor qilinmoqda.

So‘ngra majlisda Buxoro va Qashqadaryo viloyatlari hududlarini ijtimoiy-iqtisodiy rivojlantirish dasturlari ijrosini o‘rganish natijalariga ham batafsil to‘xtalib o‘tildi.

Xususan, Buxoro va Qashqadaryo viloyatlari hududlarini ijtimoiy-iqtisodiy rivojlantirish dasturlari ijrosi doirasida qator natijalarga erishilganligi hamda bu borada kelgusida amalga oshirilishi zarur bo‘lgan qator masalalar mavjudligi aniqlangan.

Jumladan, 2023-yilning yanvar-sentabr oylarida yalpi hududiy mahsulot hajmi Buxoro viloyatida 37,1 trln so‘mni, Qashqadaryo viloyatida 41,6 trln so‘mni tashkil qilgan.

Shuningdek, investitsiya dasturlari doirasida Buxoro viloyatida 463 ta loyiha ishga tushirilib, 351,3 mln dollar to‘g‘ridan-to‘g‘ri xorijiy investitsiyalar o‘zlashtirilgan bo‘lsa, Qashqadaryo viloyatida 795 ta loyiha ishga tushirilgan hamda 245,5 mln dollar to‘g‘ridan-to‘g‘ri xorijiy investitsiyalar o‘zlashtirilgan.

Iqtisodiy faollikning oshishi natijasida yangi kichik tadbirkorlik subyektlari soni Buxoro viloyatida qariyb 4,5 mingga yetib, faoliyat yuritayotgan tadbirkorlik subyektlari soni 27,5 mingdan oshgan. Qashqadaryo viloyatida esa qariyb 5 mingga yaqin yangi kichik tadbirkorlik subyektlari tashkil etilishi hisobiga faoliyat yuritayotgan tadbirkorlik subyektlari soni 29 mingdan oshgan.

2023-yilgi ishlab chiqarish va infratuzilmani rivojlantirish dasturi doirasida Buxoro viloyatida 63 ta obyektda 7,0 trln so‘mdan ziyod qurilish-montaj ishlari amalga oshirilgan, shundan 35 ta obyekt foydalanishga topshirilgan. Qashqadaryo viloyatida mazkur dastur doirasida 166 ta obyektda 1,0 trln so‘mdan ziyod qurilish-montaj ishlari amalga oshirilgan va shundan 98 tasi foydalanishga topshirilgan.

Shuningdek, o‘z vaqtida tegishli choralar ko‘rilmaganligi tufayli amalga oshirilgan ijobiy ishlar bilan birga, ikkala hududda ham ijtimoiy-iqtisodiy rivojlantirish dasturlari ijrosini ta’minlashda muammo va kamchiliklar mavjudligi ta’kidlandi hamda ularni oldini olish bo‘yicha amalga oshiriladigan tadbirlar kelishib olindi.

Majlisda hududlarda bandlik dasturi ijrosini ta’minlashda ham qator kamchiliklarga yo‘l qo‘yilib kelinayotganligi qayd etilib, mas’ul rahbarlarning axborotlari eshitildi.

Muhokama qilingan masalalar yuzasidan Qo‘mitaning tegishli qarolari qabul qilindi.

Qabulga yozilish

So'rovnoma