O'zbekiston Respublikasi Oliy Majlis Senati

Барқарор ривожланишнинг асосий омили

 

04.12.2013

Ўзбекистон Республикаси Олий Мажлиси Сенати Бюджет ва иқтисодий ислоҳотлар масалалари қўмитасининг мажлиси бўлиб ўтди.

Унда 2014 йилги асосий макроиқтисодий кўрсаткичлар, солиқ ва бюджет сиёсатининг йўналишлари ҳамда Ўзбекистон Республикаси Давлат бюджетининг параметрлари муҳокама қилинди.
Тадбирда жаҳон молиявий-иқтисодий инқирози давом этаётган бир шароитда Ўзбекистон Республикасининг 2014 йилги Давлат бюджети макроиқтисодий барқарорликни ҳамда мамлакат ЯИМнинг юқори суръатлар билан ўсишини таъминлашга, диверсификацияланган ва рақобатбардош иқтисодиётни шакллантиришга, аҳоли фаровонлиги ҳамда турмуш даражасини янада оширишга қаратилгани билан муҳим аҳамиятга эгалиги кўрсатиб ўтилди. Маълумки, 2014 йилги Давлат бюджети Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепцияси, шунингдек, Вазирлар Маҳкамасининг жорий йил 18 январдаги мажлисида давлатимиз раҳбари томонидан белгилаб берилган мамлакатни ижтимоий-иқтисодий ривожлантириш дастурининг асосий устувор вазифалари амалга оширилишини ҳисобга олган ҳолда ишлаб чиқилган.
Қайд этиб ўтилганидек, хўжалик юритувчи субъектлар ва аҳоли учун солиқ юкини янада камайтириш, солиқ солиш тизимини соддалаштириш, маҳаллий бюджетларнинг даромад қисмини ошириш ҳамда мустаҳкамлаш, солиқ солиш объектларини камайтириб кўрсатиш ва яшириш ҳолатларига чек қўйишга йўналтирилган солиқ маъмуриятчилиги чора-тадбирларини кучайтириш, шунингдек, ижтимоий соҳа ва аҳолини ижтимоий муҳофаза қилиш харажатларининг устуворлигини сақлаб қолиш солиқ сиёсати соҳасидаги асосий вазифалар бўлиб қолмоқда.
Солиқ юкини камайтириш борасидаги ғоят муҳим чоралар қаторида юридик шахсларга солинадиган фойда солиғининг базавий ставкасини 9 фоиздан 8 фоизга тушириш назарда тутилмоқда. Шунингдек, ободонлаштириш ва ижтимоий инфратузилмани ривожлантириш солиғи бўйича солиқ солинадиган база бюджетдан субсидиялар, текинга олинган маблағлар ва суғурта қопламалари суммаси миқдорида камайтирилмоқда.
Муҳокама жараёнида мамлакат бош молиявий ҳужжатида ижтимоий соҳа ва аҳолини ижтимоий қўллаб-қувватлаш харажатларини кўпайтириш тамойилини сақлаб қолиш, таълим, соғлиқни сақлаш, фан, маданият ҳамда спортни молиялаштириш, шу жумладан, олий ўқув юртларининг ўқув-лаборатория бинолари, спорт заллари ва талабалар уйларини қуриш, реконструкция қилиш, мукаммал таъмирлаш ҳамда жиҳозлашга маблағлар кўзда тутилгани алоҳида қайд этилди.
Бундан ташқари, иш ҳақи, стипендиялар, ижтимоий нафақалар ва пенсияларни инфляция суръатларидан юқори миқдорларда ошириш йўли билан аҳоли даромадлари ҳамда турмуш даражаси оғишмай ўсишини таъминлаш, бюджет маблағларидан фойдаланиш самарадорлигини ошириш, аҳолига кўрсатиладиган ижтимоий ёрдамнинг манзиллилигини кучайтириш, бюджетлараро муносабатлар тизимини янада ислоҳ қилиш ва маҳаллий давлат ҳокимияти органларининг мустақиллигини ҳамда даромадлар базасини кенгайтиришдан ва ресурслардан фойдаланиш самарадорлигини юксалтиришдан манфаатдорлигини кучайтириш ҳам назарда тутилмоқда.
Сенаторлар ўз чиқишларида солиқ ва бюджет сиёсатининг асосий йўналишлари, шунингдек, 2014 йилги Давлат бюджетининг асосий параметрларига тўхталиб ўтдилар. Хусусан, жамият ҳаётининг барча соҳаларидаги ислоҳотларни янада чуқурлаштириш ва халқ фаровонлигини изчил ошириш, иқтисодий ўсишнинг барқарор юқори суръатларини сақлаб қолиш, саноат тармоқларини, йўл-транспорт ва коммуникация инфратузилмасини жадал ривожлантириш ҳамда модернизация қилиш, қишлоқда намунали лойиҳалар асосида уй-жойлар қурилишини кенгайтириш бўйича фаол инвестиция сиёсатини амалга оширишнинг давом эттирилиши таъкидланди.
Шунингдек, ишбилармонлик муҳитини янада яхшилаш, кичик бизнес ва хусусий тадбиркорликни қўллаб-қувватлаш, аҳоли даромадлари, турмуш даражаси ва сифати янада ўсишини таъминлашга қаратилган чора-тадбирларга алоҳида эътибор берилганлиги қайд этилди.
Мажлисда муҳокама қилинган масалалар юзасидан тегишли қарор қабул қилинди.

Ўзбекистон Республикаси Олий Мажлиси Сенатининг
Матбуот хизмати.

***

Barqaror rivojlanishning asosiy omili

O‘zbekiston Respublikasi Oliy Majlisi Senati Byudjet va iqtisodiy islohotlar masalalari qo‘mitasining majlisi bo‘lib o‘tdi.
Unda 2014 yilgi asosiy makroiqtisodiy ko‘rsatkichlar, soliq va byudjet siyosatining yo‘nalishlari hamda O‘zbekiston Respublikasi Davlat byudjetining parametrlari muhokama qilindi.
Tadbirda jahon moliyaviy-iqtisodiy inqirozi davom etayotgan bir sharoitda O‘zbekiston Respublikasining 2014 yilgi Davlat byudjeti makroiqtisodiy barqarorlikni hamda mamlakat YaIMning yuqori sur'atlar bilan o‘sishini ta'minlashga, diversifikatsiyalangan va raqobatbardosh iqtisodiyotni shakllantirishga, aholi farovonligi hamda turmush darajasini yanada oshirishga qaratilgani bilan muhim ahamiyatga egaligi ko‘rsatib o‘tildi. Ma'lumki, 2014 yilgi Davlat byudjeti Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi, shuningdek, Vazirlar Mahkamasining joriy yil 18 yanvardagi majlisida davlatimiz rahbari tomonidan belgilab berilgan mamlakatni ijtimoiy-iqtisodiy rivojlantirish dasturining asosiy ustuvor vazifalari amalga oshirilishini hisobga olgan holda ishlab chiqilgan.
Qayd etib o‘tilganidek, xo‘jalik yurituvchi sub'ektlar va aholi uchun soliq yukini yanada kamaytirish, soliq solish tizimini soddalashtirish, mahalliy byudjetlarning daromad qismini oshirish hamda mustahkamlash, soliq solish ob'ektlarini kamaytirib ko‘rsatish va yashirish holatlariga chek qo‘yishga yo‘naltirilgan soliq ma'muriyatchiligi chora-tadbirlarini kuchaytirish, shuningdek, ijtimoiy soha va aholini ijtimoiy muhofaza qilish xarajatlarining ustuvorligini saqlab qolish soliq siyosati sohasidagi asosiy vazifalar bo‘lib qolmoqda.
Soliq yukini kamaytirish borasidagi g‘oyat muhim choralar qatorida yuridik shaxslarga solinadigan foyda solig‘ining bazaviy stavkasini 9 foizdan 8 foizga tushirish nazarda tutilmoqda. Shuningdek, obodonlashtirish va ijtimoiy infratuzilmani rivojlantirish solig‘i bo‘yicha soliq solinadigan baza byudjetdan subsidiyalar, tekinga olingan mablag‘lar va sug‘urta qoplamalari summasi miqdorida kamaytirilmoqda.
Muhokama jarayonida mamlakat bosh moliyaviy hujjatida ijtimoiy soha va aholini ijtimoiy qo‘llab-quvvatlash xarajatlarini ko‘paytirish tamoyilini saqlab qolish, ta'lim, sog‘liqni saqlash, fan, madaniyat hamda sportni moliyalashtirish, shu jumladan, oliy o‘quv yurtlarining o‘quv-laboratoriya binolari, sport zallari va talabalar uylarini qurish, rekonstruksiya qilish, mukammal ta'mirlash hamda jihozlashga mablag‘lar ko‘zda tutilgani alohida qayd etildi.
Bundan tashqari, ish haqi, stipendiyalar, ijtimoiy nafaqalar va pensiyalarni inflyasiya sur'atlaridan yuqori miqdorlarda oshirish yo‘li bilan aholi daromadlari hamda turmush darajasi og‘ishmay o‘sishini ta'minlash, byudjet mablag‘laridan foydalanish samaradorligini oshirish, aholiga ko‘rsatiladigan ijtimoiy yordamning manzilliligini kuchaytirish, byudjetlararo munosabatlar tizimini yanada isloh qilish va mahalliy davlat hokimiyati organlarining mustaqilligini hamda daromadlar bazasini kengaytirishdan va resurslardan foydalanish samaradorligini yuksaltirishdan manfaatdorligini kuchaytirish ham nazarda tutilmoqda.
Senatorlar o‘z chiqishlarida soliq va byudjet siyosatining asosiy yo‘nalishlari, shuningdek, 2014 yilgi Davlat byudjetining asosiy parametrlariga to‘xtalib o‘tdilar. Xususan, jamiyat hayotining barcha sohalaridagi islohotlarni yanada chuqurlashtirish va xalq farovonligini izchil oshirish, iqtisodiy o‘sishning barqaror yuqori sur'atlarini saqlab qolish, sanoat tarmoqlarini, yo‘l-transport va kommunikatsiya infratuzilmasini jadal rivojlantirish hamda modernizatsiya qilish, qishloqda namunali loyihalar asosida uy-joylar qurilishini kengaytirish bo‘yicha faol investitsiya siyosatini amalga oshirishning davom ettirilishi ta'kidlandi.
Shuningdek, ishbilarmonlik muhitini yanada yaxshilash, kichik biznes va xususiy tadbirkorlikni qo‘llab-quvvatlash, aholi daromadlari, turmush darajasi va sifati yanada o‘sishini ta'minlashga qaratilgan chora-tadbirlarga alohida e'tibor berilganligi qayd etildi.
Majlisda muhokama qilingan masalalar yuzasidan tegishli qaror qabul qilindi.

O‘zbekiston Respublikasi Oliy Majlisi Senatining
Matbuot xizmati.

Русский

Copyright © 2005 O'zbekiston Respublikasi Oliy Majlisining Senati