O'zbekiston Respublikasi Oliy Majlis Senati

Қонунлар ижросига бағишланди

 

03.12.2013

Жиззах вилоятида Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитаси ҳамда халқ депутатлари вилоят Кенгашининг қўшма мажлиси бўлиб ўтди. Унда “Ветеринария тўғрисида”ги ва “Наслчилик тўғрисида”ги Ўзбекистон Республикасининг қонунлари ижросини ўрганиш натижалари муҳокама этилди.

Жиззах вилоятида “Ветеринария тўғрисида”ги Ўзбекистон Республикаси қонуни ижросини таъминлашга алоҳида эътибор қаратилмоқда. Бу борада вилоят ветеринария давлат бошқармаси таркибидаги вилоят давлат инспекцияси, эпизоотияларга қарши курашиш отряди, вилоят ветеринария лабораторияси, 12 туман ва 2 шаҳар ветеринария бўлими, шунингдек, туманлардаги 20 ветеринария-санитария экспертиза лабораториясининг фаолияти муҳим аҳамият касб этаётир.

Таъкидланишича, вилоятда эпизоотик касалликларга қарши муҳим чора-тадбирлар амалга оширилмоқда. 2013 йилнинг ўтган даврида 731,3 минг бош қорамол, 1 миллион 611,6 минг бош қўй-эчки, 21,3 минг бош йилқи, 171 бош туя, 2,7 минг бош чўчқа, 2 миллион 37,9 минг бош парранда ва бошқа турдаги чорва моллари ветеринария назоратидан ўтказилган.

Қўшма мажлисда вилоятда дунё миқёсидаги маҳсулдор чорва моллари генофондидан фойдаланиш, зотдор чорва молларини кўпайтиришда маълум ютуқларга эришилаётгани таъкидланди. 2006-2013 йиллар мобайнида Германиядан 496 бош, Польшадан 262 бош, Украинадан 498 бош, Қозоғистондан 888 бош зотли қорамол харид қилиниб, улардан ҳозиргача 8 минг 402 бош зотли бузоқ олингани алоҳида эътироф этилди.

Вилоятда наслли чорвачиликни янада ривожлантиришда “Плем-Элита насл” бирлашмаси, “Насл-хизмат” корхонаси ҳамда ихтисослаштирилган чорвачилик хўжаликлари муҳим аҳамият касб этмоқда. Айни пайтда наслдор молларнинг асосий таркибини ола голштейн, қизил чўл ва швиц зотли моллар ташкил этаётир.

Тадбирда бир қатор туманларда ветеринария бўлимлари ва ветеринария лабораториялари ўз биноларига эга эмаслиги, зарур транспорт воситалари билан таъминланмагани қайд қилинди. Вилоятда наслчилик иши ва чорвачилик бўйича давлат инспекцияси наслли чорвачиликни ривожлантириш, илмий-тадқиқот ишларини ташкил этиш, селекция марказлари ҳамда назорат-синов станциялари барпо этиш борасидаги ишлар самарадорлигини янада ошириши зарурлиги таъкидланди.

***

Qonunlar ijrosiga bag‘ishlandi

Jizzax viloyatida O‘zbekiston Respublikasi Oliy Majlisi Senatining Agrar, suv xo‘jaligi masalalari va ekologiya qo‘mitasi hamda xalq deputatlari viloyat Kengashining qo‘shma majlisi bo‘lib o‘tdi. Unda “Veterinariya to‘g‘risida”gi va “Naslchilik to‘g‘risida”gi O‘zbekiston Respublikasining qonunlari ijrosini o‘rganish natijalari muhokama etildi.

Jizzax viloyatida “Veterinariya to‘g‘risida”gi O‘zbekiston Respublikasi qonuni ijrosini ta’minlashga alohida e’tibor qaratilmoqda. Bu borada viloyat veterinariya davlat boshqarmasi tarkibidagi viloyat davlat inspeksiyasi, epizootiyalarga qarshi kurashish otryadi, viloyat veterinariya laboratoriyasi, 12 tuman va 2 shahar veterinariya bo‘limi, shuningdek, tumanlardagi 20 veterinariya-sanitariya ekspertiza laboratoriyasining faoliyati muhim ahamiyat kasb etayotir.

Ta’kidlanishicha, viloyatda epizootik kasalliklarga qarshi muhim chora-tadbirlar amalga oshirilmoqda. 2013-yilning o‘tgan davrida 731,3 ming bosh qoramol, 1 million 611,6 ming bosh qo‘y-echki, 21,3 ming bosh yilqi, 171 bosh tuya, 2,7 ming bosh cho‘chqa, 2 million 37,9 ming bosh parranda va boshqa turdagi chorva mollari veterinariya nazoratidan o‘tkazilgan.

Qo‘shma majlisda viloyatda dunyo miqyosidagi mahsuldor chorva mollari genofondidan foydalanish, zotdor chorva mollarini ko‘paytirishda ma’lum yutuqlarga erishilayotgani ta’kidlandi. 2006-2013-yillar mobaynida Germaniyadan 496 bosh, Polshadan 262 bosh, Ukrainadan 498 bosh, Qozog‘istondan 888 bosh zotli qoramol xarid qilinib, ulardan hozirgacha 8 ming 402 bosh zotli buzoq olingani alohida e’tirof etildi.

Viloyatda naslli chorvachilikni yanada rivojlantirishda “Plem-Elita nasl” birlashmasi, “Nasl-xizmat” korxonasi hamda ixtisoslashtirilgan chorvachilik xo‘jaliklari muhim ahamiyat kasb etmoqda. Ayni paytda nasldor mollarning asosiy tarkibini ola golshteyn, qizil cho‘l va shvits zotli mollar tashkil etayotir.

Tadbirda bir qator tumanlarda veterinariya bo‘limlari va veterinariya laboratoriyalari o‘z binolariga ega emasligi, zarur transport vositalari bilan ta’minlanmagani qayd qilindi. Viloyatda naslchilik ishi va chorvachilik bo‘yicha davlat inspeksiyasi naslli chorvachilikni rivojlantirish, ilmiy-tadqiqot ishlarini tashkil etish, seleksiya markazlari hamda nazorat-sinov stansiyalari barpo etish borasidagi ishlar samaradorligini yanada oshirishi zarurligi ta’kidlandi.

UzA

Русский

Copyright © 2005 O'zbekiston Respublikasi Oliy Majlisining Senati