O'zbekiston Respublikasi Oliy Majlis Senati

Оилавий тадбиркорлик – фаровонлик омили

 

01.11.2013

Андижонда Ўзбекистон Республикаси Олий Мажлиси Сенатининг Фан, таълим, маданият ва спорт ҳамда Бюджет ва иқтисодий ислоҳотлар масалалари қўмиталари ҳамкорлигида “Оилавий бизнесни ривожлантириш – аҳоли бандлигини таъминлашнинг муҳим омили” мавзусида семинар ўтказилди.

Ўзбекистон Республикаси Олий Мажлиси Сенати аъзолари, халқ депутатлари вилоят Кенгаши депутатлари, туман ва шаҳарлар ҳокимлари ўринбосарлари, вилоят меҳнат ва аҳолини ижтимоий муҳофаза қилиш бошқармаси, “Маҳалла” хайрия жамоат фонди вилоят бўлими, “Камолот” ёшлар ижтимоий ҳаракати вилоят кенгаши, тижорат банкларининг вилоят бўлимлари вакиллари, ҳуқуқшунослар, тадбиркорлар ҳамда оммавий ахборот воситалари ходимлари иштирок этган семинарда кичик бизнес ва хусусий тадбиркорликни, айниқса, оилавий тадбиркорликни ривожлантириш орқали аҳоли бандлигини таъминлаш масалалари атрофлича муҳокама қилинди.

Президентимиз Ислом Каримов томонидан илгари сурилган Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепцияси асосида 2012 йил 26 апрелда қабул қилинган Ўзбекистон Республикасининг “Оилавий тадбиркорлик тўғрисида”ги қонуни ана шу йўналишдаги фаолиятни тартибга солиш ва ҳуқуқий базасини мустаҳкамлашда муҳим омил бўлаётгани қайд этилди. Бу борада вилоятда амалга оширилаётган ишлар таҳлил қилинди.

– Жорий йилнинг ўтган тўққиз ойида вилоятда кичик бизнес ва хусусий тадбиркорликни ривожлантириш борасида салмоқли ишлар амалга оширилган, – деди Ўзбекистон Республикаси Олий Мажлиси Сенатининг Фан, таълим, маданият ва спорт масалалари қўмитаси раиси М.Хўжамбердиев. – Ишлаб чиқарилган жами ички маҳсулотнинг 60,8 фоизи, шунингдек, меҳнат билан банд аҳолининг 82,5 фоизи айнан ана шу соҳа ҳиссасига тўғри келмоқда. Вилоятда жорий йилнинг ўтган даврида 147 оилавий тадбиркорлик субъекти ташкил этилиб, 557 янги иш ўрни яратилган. Оилавий тадбиркорлик ва ҳунармандчиликни молиявий қўллаб-қувватлаш мақсадида вилоятдаги тижорат банклари томонидан 11,2 миллиард сўм имтиёзли кредитлар ажратилган. 

Избоскан, Асака, Хўжаобод ва Булоқбоши туманларида оилавий тадбиркорликни ривожлантириш борасида салмоқли ишлар амалга оширилгани алоҳида эътироф этилди. Семинар доирасида вилоятдаги банклар томонидан ташкил этилган кўргазмаларда кичик ва хусусий бизнесни, хусусан, оилавий тадбиркорликни ривожлантириш, молиявий қўллаб-қувватлаш борасида амалга оширилаётган чора-тадбирлар намойиш этилди.

Ёшларни, айниқса, касб-ҳунар коллежи битирувчиларини тадбиркорликка жалб этиш орқали уларнинг бандлигини таъминлаш масалалари ҳам таҳлил қилинди. Хусусан, ўтган ўқув йилида коллеж битирувчилари ва уларнинг бизнес лойиҳаларини қўллаб-қувватлаш мақсадида вилоят ҳокимлиги, марказий банк вилоят бўлими ҳамда вилоят ўрта махсус касб-ҳунар таълими бошқармаси ҳамкорлигида коллеж битирувчилари орасида “Энг яхши мутахассис”, “Энг яхши бизнес лойиҳа” йўналишларида танловлар, вилоятдаги 117 касб-ҳунар коллежида битирувчиларни тадбиркорликка жалб этиш бўйича учрашув ва давра суҳбатлари ўтказилгани таъкидланди.

Анжуманда мазкур йўналишдаги ишлар самарадорлигини янада ошириш юзасидан таклиф ва фикр-мулоҳазалар билдирилди. Аҳоли ўртасида Ўзбекистон Республикасининг “Оилавий тадбиркорлик тўғрисида”ги қонуни мазмун-моҳиятини тушунтириш бўйича тарғибот ишларини янада кучайтириш зарурлиги қайд этилди.

***

Oilaviy tadbirkorlik – farovonlik omili

Andijonda O‘zbekiston Respublikasi Oliy Majlisi Senatining Fan, ta’lim, madaniyat va sport hamda Byudjet va iqtisodiy islohotlar masalalari qo‘mitalari hamkorligida “Oilaviy biznesni rivojlantirish – aholi bandligini ta’minlashning muhim omili” mavzusida seminar o‘tkazildi.

O‘zbekiston Respublikasi Oliy Majlisi Senati a’zolari, xalq deputatlari viloyat Kengashi deputatlari, tuman va shaharlar hokimlari o‘rinbosarlari, viloyat mehnat va aholini ijtimoiy muhofaza qilish boshqarmasi, “Mahalla” xayriya jamoat fondi viloyat bo‘limi, “Kamolot” yoshlar ijtimoiy harakati viloyat kengashi, tijorat banklarining viloyat bo‘limlari vakillari, huquqshunoslar, tadbirkorlar hamda ommaviy axborot vositalari xodimlari ishtirok etgan seminarda kichik biznes va xususiy tadbirkorlikni, ayniqsa, oilaviy tadbirkorlikni rivojlantirish orqali aholi bandligini ta’minlash masalalari atroflicha muhokama qilindi.

Prezidentimiz Islom Karimov tomonidan ilgari surilgan Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi asosida 2012-yil 26-aprelda qabul qilingan O‘zbekiston Respublikasining “Oilaviy tadbirkorlik to‘g‘risida”gi qonuni ana shu yo‘nalishdagi faoliyatni tartibga solish va huquqiy bazasini mustahkamlashda muhim omil bo‘layotgani qayd etildi. Bu borada viloyatda amalga oshirilayotgan ishlar tahlil qilindi.

– Joriy yilning o‘tgan to‘qqiz oyida viloyatda kichik biznes va xususiy tadbirkorlikni rivojlantirish borasida salmoqli ishlar amalga oshirilgan, – dedi O‘zbekiston Respublikasi Oliy Majlisi Senatining Fan, ta’lim, madaniyat va sport masalalari qo‘mitasi raisi M.Xo‘jamberdiyev. – Ishlab chiqarilgan jami ichki mahsulotning 60,8 foizi, shuningdek, mehnat bilan band aholining 82,5 foizi aynan ana shu soha hissasiga to‘g‘ri kelmoqda. Viloyatda joriy yilning o‘tgan davrida 147 oilaviy tadbirkorlik sub’ekti tashkil etilib, 557 yangi ish o‘rni yaratilgan. Oilaviy tadbirkorlik va hunarmandchilikni moliyaviy qo‘llab-quvvatlash maqsadida viloyatdagi tijorat banklari tomonidan 11,2 milliard so‘m imtiyozli kreditlar ajratilgan.

Izboskan, Asaka, Xo‘jaobod va Buloqboshi tumanlarida oilaviy tadbirkorlikni rivojlantirish borasida salmoqli ishlar amalga oshirilgani alohida e’tirof etildi. Seminar doirasida viloyatdagi banklar tomonidan tashkil etilgan ko‘rgazmalarda kichik va xususiy biznesni, xususan, oilaviy tadbirkorlikni rivojlantirish, moliyaviy qo‘llab-quvvatlash borasida amalga oshirilayotgan chora-tadbirlar namoyish etildi.

Yoshlarni, ayniqsa, kasb-hunar kolleji bitiruvchilarini tadbirkorlikka jalb etish orqali ularning bandligini ta’minlash masalalari ham tahlil qilindi. Xususan, o‘tgan o‘quv yilida kollej bitiruvchilari va ularning biznes loyihalarini qo‘llab-quvvatlash maqsadida viloyat hokimligi, markaziy bank viloyat bo‘limi hamda viloyat o‘rta maxsus kasb-hunar ta’limi boshqarmasi hamkorligida kollej bitiruvchilari orasida “Eng yaxshi mutaxassis”, “Eng yaxshi biznes loyiha” yo‘nalishlarida tanlovlar, viloyatdagi 117 kasb-hunar kollejida bitiruvchilarni tadbirkorlikka jalb etish bo‘yicha uchrashuv va davra suhbatlari o‘tkazilgani ta’kidlandi.

Anjumanda mazkur yo‘nalishdagi ishlar samaradorligini yanada oshirish yuzasidan taklif va fikr-mulohazalar bildirildi. Aholi o‘rtasida O‘zbekiston Respublikasining “Oilaviy tadbirkorlik to‘g‘risida”gi qonuni mazmun-mohiyatini tushuntirish bo‘yicha targ‘ibot ishlarini yanada kuchaytirish zarurligi qayd etildi.

 

Русский

Copyright © 2005 O'zbekiston Respublikasi Oliy Majlisining Senati