Кичик ва хусусий бизнес маҳсулотлари экспорти, мамлакатимизда ишлаб чиқарилган маҳсулот жаҳон бозорига чиқиши учун ташкилий-ҳуқуқий жиҳатдан қулай шароитлар яратиш давлат ташқи иқтисодий фаолиятининг устувор йўналишларидан бири ҳисобланади.
Сенатнинг Бюджет ва иқтисодий ислоҳотлар масалалари қўмитаси Ташқи сиёсат масалалари қўмитаси билан биргаликда ташкил этган давра суҳбати “Кичик ва хусусий бизнес корхоналари маҳсулотлари экспортини рағбатлантириш ҳамда валюта ресурсларидан самарали фойдаланиш йўллари” мавзусига бағишланди.
Анжуманда шу нарса таъкидландики, кичик ва ўрта бизнес мамлакат иқтисодиётида ўз маррасини мустаҳкамлаб бормоқда, ҳозирги вақтда мамлакат ялпи ички маҳсулотида кичик бизнес ва хусусий тадбиркорликнинг улуши 40 фоиздан ошди. Бироқ Ўзбекистон Республикаси Президентининг Вазирлар Маҳкамасининг 2006 йил 10 февралда бўлиб ўтган, 2005 йилда мамлакатни ижтимоий-иқтисодий ривожлантириш якунлари ва 2006 йилда иқтисодий ислоҳотларни чуқурлаштиришнинг энг муҳим устувор йўналишларига бағишланган йиғилишидаги маърузасида таъкидланганидек, “кичик корхоналар ёки хусусий тадбиркорларнинг ҳаммаси ҳам ўз маҳсулотини мустақил равишда самарали экспорт қила олмайди, албатта”.
Мамлакатимизда кичик ва хусусий бизнес корхоналарини янада ривожлантириш, улар томонидан ишлаб чиқарилаётган экспорт маҳсулотларининг рақобатбардошлигини ошириш юзасидан салмоқли ишлар қилинмоқда.
Давра суҳбати иштирокчилари кичик ва хусусий бизнес субъектларининг экспорт салоҳиятини кенгайтириш ҳамда рўёбга чиқариш билан боғлиқ бир қатор долзарб масалаларни муҳокама этдилар. Хусусан божхона ва солиқ тўғрисидаги, кичик ва хусусий бизнес субъектларининг маҳсулоти экспортини рағбатлантиришга йўналтирилган қонун ҳужжатларини такомиллаштиришга эътибор қаратилди. Товарлар ва хизматлар рақобатбардошлигини ошириш, тадбиркорларга шериклар излашда ахборот базасидан фойдаланиш эркинлигини таъминлаш, ташқи бозордаги вазият тўғрисида мукаммал ахборотга эга бўлишларига эришиш улар учун ўз маҳсулотини экспортга етказиб беришда жуда муҳим, баъзан эса ҳал этувчи аҳамиятга молик эканлиги айтиб ўтилди. Давлатимизнинг экспорт-импортда ижобий қолдиққа эришиш, мамлакатимизнинг олтин-валюта захирасини кўпайтириш имконини берган валюта сиёсатини янада изчиллик билан амалга ошириш йўллари ҳам муҳокама этилди.
Сенаторлар тадбиркорлик субъектларига мавжуд экспорт салоҳиятини тўла рўёбга чиқаришда тегишли давлат тузилмаларининг амалий ёрдами самарадорлигини ошириш ва таъсирчанлигини кучайтириш зарурлигига ҳам эътиборни қаратдилар.
Муҳокамалар асносида мамлакатимиз тадбиркорлик субъектларининг экспорт салоҳиятини кенгайтириш ва рўёбга чиқаришга доир ҳуқуқий базани такомиллаштиришга қаратилган тавсиялар ҳам билдирилди.
Тадбирда сенаторлар, дипломатия корпуси, Ташқи иқтисодий алоқалар, инвестициялар ва савдо вазирлиги, Божхона қўмитаси, Ўзбекистон Республикаси Марказий банки, Ўзбекистон Савдо-саноат палатаси намояндалари, тадбиркорлар, фермерлар ва оммавий ахборот воситаларининг вакиллари иштирок этдилар.